2008/7/22

ولا لاقي قيمة لنفسي ولا معني لحياتي ولاعارف انا مين ولا عايز ايه؟
ايه فايدتي في الحياه كل الناس اللي حواليه أحسن مني كلهم أفضل.
مش بعرف أعمل حاجه
مش عارف ربنا خلقني ليه
مش لاقي جوايا أي امكانيات بتقولولي استغل مواهبك
هي فين أصلا مواهبي
أنا مضايق لأ ومحبط كمان لأني مش بعمل اي حاجه مفيده وده لأني مش بعرف ومعنديش اللي عند غيري.

ياشباب هو ده كان لسان حالي دايما شايف نفسي قليل ومعنديش ثقه في نفسي لغاية ماعرفت وفهمت كمان أن كل واحد فينا هو عند ربنا مميز
أيوه صدقوني مميز مش مصدقني أنا كمان مكنتش مصدق لغاية ماعرفت قيمتي الحقيقه لما فهمت ودورت جوه نفسي عن قيمتي الحقيقه

وفهمت كمان أن قمتي بتكمن في كوني إنسان ربنا خلقه وميزه عن كل المخلوقات اللي في الأرض والأهم والأجمل لما عرفت أني عند ربنا غالي جداً وسمعته وهو بيقولي أنا بحبك يا أبني فهمت بس ساعتها أني كنت قافل وداني ومش سامع أي صوت غير صوت نفسي وبس بكلامها السلبي المحبط
مش عايز أقول لك اد ايه فرقت معايا الحياه وشفت نفسي جميل أوي في عنين ربنا وعنين نفسي وكمان عنين الناس

سوسنه مكرم